Marshy is addicted to Food

呢個星期真辛苦, 攪完幾日展覽跟住又要馬上去大陸出席廣交會. 呢晚剛剛係大陸番落來,另一半好有心地去車站接我幫我提行李回家. 係大陸食左幾日中餐, 一定要食餐西既來BALANCE一下. 近近地又去左MEGABOX既CPK度食, 貪佢唔洗等位. 今次叫左幾款未試過既來試下~ 加州鮮蝦卷($62) 一碟有4件, 每件都頗大件, 份量其實都幾勁的. 米粉皮好薄好有彈性, 生菜甘筍等配料好新鮮, 蝦亦頗大隻同彈牙.個人喜歡就咁食唔洗點醬, 偏淡少少不過仍然有點味道的,很清新輕怡的一個前菜; 點埋醬食既話, 酸酸甜甜濃郁的味道又很開胃. 旁邊的四川椰菜沙律就不太懂得欣賞了,椰菜硬硬的又吸唔到麻醬既味道, 很怪. 燒烤雞肉沙律(半份$56) 一向喜歡這裡的沙律. 半份既份量都十分多, 賣相亦十分好, 最喜歡的就是佢既沙律醬不會太多太少, 剛剛好而且很均勻. 不過今次的烤雞有點乾, 扣了點分. 蒜香鮮蝦薄餅($88) 有好濃的蒜香味, 而且芝士很足夠.咬一口, 整個口腔都充滿住蒜香既味道, 鮮蝦反而只是配角. 而薄餅的餅底亦做得很不錯, 批邊脆脆的, 而且不會好像PIZZA HUT勁厚勁滯, 又唔會薄到好似餅乾咁, 很不錯. 意粉類還是點了我最愛吃的CARBONARA 煙肉芝士忌廉汁意大利粉($76) 這裡的CARBONARA算是我在香港吃過的最好吃的了. 忌廉汁不會太多, '傑傑'的全黏在意粉上; 煙肉亦有畫龍點精之效, 令意粉更惹味. 可惜青豆還是很多...如果少D青豆, 加多隻溫泉蛋係上面就PERFECT了. 雖然很飽, 但仍堅持要吃甜品 CHOCOLATE ROUGH BROWNIE 熱熱的朱古力BROWNIE放在冰凍的雲呢拿雪糕上, 再加上面層的一大堆WHIP CREAM, 大口吃下去, 又暖又冰的感覺交集住實在太刺激了. 水準依然咁好, 甜度依然咁高. 埋野2個人差不多400蚊左右, 都算幾貴了. 不過食物水準當然也值回票價了. California Pizza Kitchen 九龍灣宏照道38號MegaBox L11-10號鋪 tel: 3421 2351