Marshy is addicted to Food

同事做到月底就離開, 所以呢晚同佢攪個私人farewell dinner. 朋友提議去呢間食潮州野, 話食過不錯, 好,就試下吧. 7點左右入到去都仲有位,唔洗等, 裝修都係一般中式格局.貴賓房睇落都幾多, 不過透明度好高的. 枱與枱之間好密,有機密野傾就千其唔好揀呢間. 眼見餐牌套餐都幾貴, 所以都係散叫算了. 鹵水併盤($78) 併既款式就真係幾少,只有幾片紅腸,豬耳絲,鹵水鵝,同一隻鹵水蛋. 豬耳絲還算不錯, 鵝就偏瘦同多骨,隻鹵水蛋唔知有冇鹵到一個鐘, 同食雞蛋冇咩分別. 總括來講係好唔抵既一個併盤. 水蜜桃松子魚($98) 都幾大條,夠3個人食. 個汁偏甜, 但帶點點酸味. 好開胃既一味菜, 算係做得不過不失了. 彩椒珍菌貴花蚌($88) 比較欣賞既一道菜. 貴花蚌幾大隻好肥美, 鮮味十足.西芹唔會好老有渣. 唯一缺點係蚌太少同埋太多油了. 蟹粉豆苗($88) 與其說是蟹粉豆苗, 倒不如說是野菌獻汁豆苗仲好. 因為我真係食唔到有咩蟹粉, 只係食到一pat pat獻汁. 豆腐海皇羹($68) 呢個羹都係比較不錯. 材料都好足,d蝦唔會'梅',而且一窩都幾多,可以分到6大碗左右. 福果芋泥($12) 十分十分之甜既一個芋泥.不過味道不錯的.如果食得甜既可以一試. 銀耳桂花糕($18) 好清新既一個甜點. 除左本身桂花糕十分清香之外, 仲加入左銀耳更爽甜,食完可以消一消油膩感, 不錯. 3個人埋單$49x. 其實都幾貴, 菜式有d好有d唔好, 總括來講一般, 不過有機會都會再來試下其他菜式. 潮客 鑽石山荷里活廣場3樓306店 tel: 2625 9388