Marshy is addicted to Food

和民居酒屋係香港都開多好幾年,大大話話分店都有好多間, 我諗都冇乜邊個香港人未食過呢間港式日本居酒屋. 想當年剛開業既時候人山人海, 唔等上一個鐘都唔洗旨意有位(尤其銅鑼灣個間). 不過近期熱潮逐漸減退,呢晚晚飯時間行經德福分店,都ok唔洗等位, 見咁耐冇食過, 所以就試下佢既秋之特選吧. 餐牌同以前都係差不多, 所以就專攻佢季節限定既秋之料理吧. 蟹肉野菜卷 ($34) 其實蟹肉就真係食唔出,不過蔬菜好多好新鮮,醬汁唔係好濃, 作為一個健康既前菜都不錯. 茭白荀牛肉卷 ($34) 牛肉好鮮嫩,唔會好老,好夠醬汁,雖然白荀唔係太靚既貨色, 不過牛肉搭夠. 鹽燒牛舌. 嫩肩肉 ($49) 由於自己燒, 所以可以自行調較生熟度. 個人比較喜歡剛剛熟. 牛舌比肩肉更彈口更爽, 不過基本上牛舌係好難整得難食的. 串燒盛合 ($49) 有一串燒鰻魚, 一串帶子, 一串雞肉, 一串雞軟骨, 一串雞腎同一串雞翼. 燒鰻魚不錯; 帶子有點硬; 雞肉好鞋, 不吃也罷; 雞軟骨d骨亦都係硬, 名不符實; 雞賢彈口,不錯; 雞翼普通, 冇咩特別. 脆羊肉沙律 ($34) 舊炸羊肉好油又冇羊肉味, 不過好彩墊底既沙律好多菜幾新鮮. 但係整個菜都好辣, 如果唔食得辣, 記得叫佢個汁分開另上. 朱古力軟心蛋糕配栗子雪糕 ($34) 朱古力蛋糕不錯, 不過冇話十分好食. 入面既軟心唔太夠軟,仲有少少硬. 最驚喜既係栗子雪糕, 內裡加左粒粒栗子, 好有趙口,而且味道唔係好甜, 不俗. 抹茶雪糕紅豆丸子 ($14) 丸子差左少少,紅豆同抹茶都好普通, 冇甚特別. 不過14蚊,唔好奢求太多了. 基本上呢間港式居酒屋就係對香港人口味, 如果對日本料理冇咩好高要求,朋友聚下餐都可以諗呢間. 和民居食屋 Watami Japanese Casual Restaurant 九龍灣德福廣場二期429號舖 tel: 2997 3001