Marshy is addicted to Food

有朋自英國回港, 約係尖咀食飯. 諗極都諗唔到之際, 係openrice見到呢間老字號既鼓油西餐廳, 決定試一試.


由於有訂位, 所以唔洗等位. 現場所見其實如果唔book位都應該有位, 不過都幾多人, 有大約8成人左右.
打開餐牌, 價錢都真係唔平, 閒閒地一個餐都百幾二百蚊一位, 一個意粉都要差不多一百蚊.
經過商議後, 決定叫左:

二人套餐 ($268 + 1)


龍蝦湯或大蝦沙律
由於我地4個人唔夠分個湯, 所以2個都要左大蝦沙律. 如圖所見, 正確名稱應該叫''沙律醬浸大蝦''. 一大pat沙律醬真係好似唔洗錢一樣, 起碼有2,3吋厚. 不過當中既大蝦其實不錯的, 有起碼4,5隻, 都幾爽口. 如果唔係D沙律醬, 呢個沙律真的不錯.


瑞士雞翼 (6隻)
店內最出名既瑞士雞翼. 雞翼算滑, 大小適中, 不過味道來講驚喜唔大. 感覺我阿媽係屋企整既都仲入味過佢. 有少少失望.


瑞士汁炒牛河
比普通乾炒牛河甜. 不過唔講得上十分好食. 味道好濃, 牛肉不錯, 唔會好UN, 都幾多片呀.


甜品 - 花餅2件
呢2件花餅真係冇法子形容. 一食第一啖, 一種7,80年代既平價奶油味道巳強烈地停留係口腔內. 呢種味道真係十幾年都冇食過. 食左一口, 實在冇辦法再擺第二啖入口.

除左餐, 我地仲叫左D散既:


燴牛脷意粉 ($60 + 1)
呢個意粉其實十分不錯, 份量好多, 牛脷都有好多條, 汁亦都好多, 甚至可以用太多來形容. 味道亦係偏濃, 不過意粉好入味, 茄醬味唔會好酸, 甜甜地恰到好處.


巨型梳乎里 ($88 + 1)
之前睇過其他食評都話過好巨型, 估唔到上枱時大家都嘩嘩聲. 真係好大個. 不過其實內裡全部都係泡狀, 所以要清哂其實都唔係好難. 個皮少少硬, 幾好食, 內裡好有蛋香, 好似食緊紙包蛋糕 + 燉蛋咁. 偏甜, 唔食得甜既人會唔中意.

順帶一提餐廳既服務, 之前係其他食評都講過呢度既侍應服務態度差. 今晚都見識到少少. 由於老字號, 所以侍應清一色係上左年紀既中年男人. 點菜時問侍應有咩好介紹, 侍應係唔會理你的, 跟住以為你點完, 自行會收哂你D餐牌. 又好似用餐之際, 人地未食完就會好快手地問你: 你唔食架呵?跟住就照收碟, 除非要叫住佢唔好收. 語氣雖然係麻麻, 不過尚可接受.
不過其實呢度既野份量都幾大, 我地3女1男食完以上既野都十分之飽.
埋單4個人食左$460, 其實唔算好貴, 不過有得揀下次都唔會再去.

太平館餐廳
Tai Ping Koon Restaurant
尖沙咀加連威老道40號
Tel: 2721-3559