Marshy is addicted to Food

自從上次睇過一集蘇絲黃介紹過呢間南亞餐廳, 一直都想試.
誰不知朋友請我食pre-birthday dinner就揀左呢間, 真係開心.
不過冇去銅鑼灣咁耐, 原來南亞唔再係利舞台對面, 而係搬左去隔離一條街近跑馬地電車路對出個條街.
由於朋友book左位, 所以唔洗等位. 一入去感覺裝修靚左, 不過格調依然.
商量過後, 由於全部女仔, 所以唔敢叫得多:



海南雞飯
有味精湯, 雞油飯同要既脾位置. 菜乾味精湯雖然都係味精, 不過感覺冇咁重, 還好. 雞油飯第一啖食落好香, 不過食多幾啖發現d飯有d硬, 有d重硬到好似食穀咁...
至於個雞就不錯, 我本人唔好蔥油, 所以齋食雞, 食落都幾有雞味, 而且應肥則肥, 應瘦則瘦, 值得一試.


秘製炒貴刁
呢個係蘇絲黃入面推介過....不過食落真係有d失望, 不外乎係一碟普通過普通既貴刁, 唔知係咪星期6晚師傅特別忙, 整得好求其, d粉有d仲係黏埋一舊, 好似擺左好耐, 講真, 我覺得連銅鑼灣個間''金不換'' (記住唔係紅磡個間!!) 既炒金邊粉都好食過佢. 失望.....


蒜蓉炒雜菜
2個字: 多油. 唔講得上好食, 只係一碟普通既炒菜. 如果你諗住健康d叫呢個菜食, 你完全錯哂.


燒雞沙律
燒雞好乾, 近乎乾到柴皮既地步, 沙律醬勁多, 好似唔洗錢咁起碼整左3分1樽落去都似. 唔得. 仲要成70蚊一個, 實在貴夾唔抵.


4式串沙爹
有蝦, 雞, 牛同豬. 由於我皮膚敏感, 所以冇食蝦. 朋友話蝦唔錯. 我試左牛同雞. 雞還可以, 不過仍有些柴皮狀態; 牛勁老, 咬整都咬唔開. 食得好辛苦. 個醬好有花生味, 沙爹味?? 完全唔覺. 不過如果唔食得甜既人會唔中意呢個醬, 因為真係好甜, 好似食緊花生糊一樣.



hot cake
呢個又係蘇絲黃推介, 標榜全港只有佢係用焗既方法去做呢個hot cake. 上枱時真係好厚好大個, 加上牛油糖醬, 食落外面真係徵脆, 內裡真係好到好鬆, 不過都幾膩, 我地5個女仔都只係食左一半就投降了.

試過一次, 基本上都唔會想再食第二次了. 不過值得一讚係serve我地既中年waitress態度真係不錯, 叫佢幫我地影相都好有耐性地影左好幾張影到我地滿意為止, 仲笑容滿面.

南亞餐廳1964
Nam Ah Restaurant
銅鑼灣禮頓道17-19號地下
Tel: 2187 3487