Marshy is addicted to Food

大住肚既家姐同姐夫來左探親, 成家一行6人去左近近地既中國芳度食晚飯.
呢間中國芳係屬於美心集團, 食既都係京川菜, 價格跟北京樓相近.
部長介紹我地食個6人套餐, 不過大肚婆好多野唔食得, 所以我地都係散叫:



雞絲粉皮
冇咩特別, 粉皮太粗, 不過附上既麻醬出奇地好食, 睇落好似好辣, 不過原來食落一d都唔係, 仲好甜, 好有花生麻油香.

涼拌海蜇
味道不太濃, 頗爽口, 分量都好多, 每條都好飽滿. 不錯的前菜.


賽螃蟹
自問好鐘意食賽螃蟹, 去親食京菜既地方一定點呢味. 食過不下數十間, 呢間算ok, 好多乾瑤柱, 不過唔係好見d蟹肉去哂邊. 蛋白唔係好滑, 不過勝在佢唔會好似有d餐廳加左成斤油去令d蛋白好似好滑. 所以健康d.


金華火腿津白
呢味完全失敗. 個汁仲係一舊舊, d津白唔'林', 一食就知d汁係臨尾先淋落d菜度, 一d都唔入味, 分量又出奇咁少, 78蚊實在唔抵.


擔擔面
一上枱時大家都好吃驚. 呢碗擺明就係陽春面(齋面), 全冇擔擔面應有既材料係入面. 問左個侍應幾次, 都確定呢碗係擔擔面. 如果呢間餐廳認為擔擔面係咁既樣, 個大厨都十分之唔店. 只希望佢真係落錯單上錯左碗面, 因為咁樣既擔擔面實在太離譜了.


排骨擔擔面
亦都係失敗之作. 擔擔面實在冇理由'水'得咁緊要, 究竟個大厨有冇食過正宗既擔擔面架?? 仲有排骨居然唔係另外用碟上, 浸哂落d湯度淋哂. 如果另外上, 一定會好食好多.


北京填鴨
京菜一定有既菜色. 呢度既北京填鴨算唔錯, 皮脆又好薄, 唔係好多脂肪, 一隻都片到廿幾塊出來. 不過比較貴, 一隻要成280蚊.

話呢度好食又唔講得上, 但又唔係十分差. 6個人食左750幾蚊, 咁既質素其實都相當唔抵, 如果同一集團內既同類餐廳比較, 覺得北京樓做得比佢好.


但係有趣地發現左佢地餐牌上其中2款菜式居然叫 '能人家叉子大燒餅' 同 '點解它似春卷', 真係攪笑.

中國芳
China Fragrance
九龍灣德福廣場1期F2號舖
Tel: 2707-9822