Marshy is addicted to Food

呢晚家姐生日, 大肚壽星女想食西餐,同埋姐夫,爸媽一行5個人近近地去左又一城間意大利餐廳食dinner.雖然係平日, 但係都幾full,book位時都要限定時間個半鐘後交枱. 不過唔緊要, 我地出名食野快, 個半鐘頭絕對冇問題.


以前食過幾次呢間餐廳, 最大既特色係價錢唔平但十分之大碟. 所以今次都唔敢叫好多野.今次試左:

是日餐湯(洋蔥湯)$50/碗


本人對洋蔥湯麻麻, 飲完呢個之後都冇改觀到. 不過整個湯都唔算好差,只係毫無特色,有d似罐頭湯. 但係最有趣係雖然佢話一碗, 但係個碗大到你唔信.一碗足足可以分到5個人飲! 所以如果諗住一人叫一碗就賴野, 飲完都唔洗食野.

蒜茸白酒汁青口($138)


一盤入面都有10多隻. 每隻都好飽滿肥嘟嘟, 就算唔點個汁食落都好有鮮味.加埋個汁就如虎添翼,濃味得來有點清爽既感覺. 值得一試.

香燒檸檬露絲瑪莉棒棒雞($130)

上枱時我仲以為d雞營養不良所以d雞腳冇哂肉,原來佢係特登咁整既.講真賣相我就唔多識欣賞了,食落都還不錯, 但都有少許'鞋'既感覺.而且雖然睇落好似好大碟, 不過每枝棒棒雞其實只有top既部份有肉,所以如果大食d,食哂都未必飽.

意大利特式併盤($388)

併盤內有: 全隻雞, 肉丸, 肉腸, 牛膝, 焗薯仔, 甜椒及洋蔥.
全隻雞: 普通燒雞大小切件,肉唔算'鞋', 就算食雞胸肉都好有彈性.感覺比食棒棒雞好.
肉丸: 太多牛肉粒混在內, 變到好'鞋'有點硬, 不太討好.
肉腸: 普通不過有點怪味,亦不太討好
牛膝: 成舊都係骨,d肉得少少, 但係d肉都十分十分之硬又'鞋', 不合格
焗薯仔: 不錯,柔軟度剛剛好
甜椒及洋蔥: 反而呢d配菜不錯, 成碟甜椒都比我一個人食哂

意大利海鮮飯($168)

此乃本人非弗(favourite).份量十分大,足4-5個人享用.海鮮好足料,d蝦好大隻,但又唔會好'梅', 芝士唔會好濃,令到成個飯唔好有膩.雖然係意大利飯,但佢又唔會做到一pat pat咁, 飯粒依然分明,但帶點黏黏感覺, 正到卑!!!

鮮果朱古力慕思($70)

每次來都必叫.朱古力慕思好濃郁朱古力味,份量足2個人食.而且伴碟既生果都好新鮮.

紐約小意大利芝士餅伴士多啤梨汁($70)

上枱簡直嚇親人, 成舊磚咁.芝士餅係好實個種,勁重芝士味.餅底加入粒粒合桃,有咬感之餘仲好對味.

喜歡呢間意大利餐廳既另一原因係佢餐前用來點面包既黑醋十分美味.

不過今次比較失望係d面包凍哂既....
而且另一唔滿意地方係晚飯時間勁多人,好嘈, 嘈到好似酒樓一樣....同整個環境完全格格不入.

Amaroni's Little Italy
九龍塘達之路80號又一城LG1-32
TEL: 2265-8818