Marshy is addicted to Food

新年將至, 呢晚同親戚一齊來帝苑軒食個團年飯.
由於親戚同呢度既部長好熟,所以變相我地每逢有特別日子要一齊食飯都一定選呢度的.
由於咁多長輩係度, 點菜就梗係由佢地發板啦, 所以基本上都唔係好知確實既菜式名稱.


先來一個杏汁豬肺湯.

湯好夠熱, 一飲巳經有好濃好香既杏仁味. 奶白色既湯味道好夠, 越飲越開胃,好少加湯既我都忍唔住要多碗.

湯料都好夠好足, 豬肺雖然有十多舊,但係因為處理得好乾淨而且又夠彈牙, 唔洗一陣巳經比人掃哂了.

菠蘿咕嚕肉

份量十足,汁巳經大部份包住了肉, 豬肉算嫩滑.但係脆醬略微厚了點. 還是怡東的好吃.

上湯豆苗

味道十分清淡,不過豆苗十分乾淨又鮮嫩,清清口腔也不錯.

海中寶(粉絲蝦仁炒蛋)

呢味係我地每次來到都會點而且清得最快既一款. 雖然材料簡單, 但炒出來十分香口,乾身得來蛋又唔會好老, 蝦仁十分爽口, 粉絲唔係太多,有咬口, 整體真係十分美味.

燒味併盤 (叉燒, 乳豬, 海蜤)

每次必點叉燒,非常一流. 叉燒十分美味, 肉嫩, 肥瘦適中, 油脂分佈十分平均, 只是這次略微太少麥牙糖醬; 乳豬皮十分脆,脂肪好薄唔算好多,水準不錯; 海蜤普通,彈牙但不夠肥美.

羊腩煲


一上枱的確十分香,主角羊腩雖然唔係好多,但係煲到好嫩好軟而且唔黏牙, 羊騷味唔係好勁,肥厚既皮實在係成舊羊腩既精髓,十分彈牙又膠; 配角支竹同冬菇都十分入味,好'淋'好好味; 後放入既生菜更將湯汁吸收哂,美味至極.

炸子雞

雞唔係好大隻, 但係肥瘦適中,十分嫩滑; 皮的確炸到好脆好薄. 吃了一舊雞腿肉, 真係滑到無人有.

牛肉/雞肉餃子

要了牛肉及雞肉各半打既餃子.

牛肉的皮頗薄,唔會好硬; 不過入面既牛肉涵好似飲菜食到既山竹牛肉, 沒甚特別.

反而雞肉的十分juicy,真係有雞既鮮味, 十分不錯.

蟹子炒飯

蟹子勁多,食落滿口卜卜脆,飯略嫌炒得唔夠乾身,多油左一點.

最後上一個甜品有合桃酥+彩紅芒果卷

合桃酥十分脆不過合桃味就唔多夠了,甜味冇乜; 反而彩紅芒果卷偏甜,但係糯米太大舊,基本上除左食到糯米味都食唔到其他味.

呢餐總括來講還不錯, 但係比起以前感覺水準下降了. 不過最掃興既係安排左我地坐係近升降機既位置, 同埋適逢樓上結婚,唱k之聲不斷,整晚就係度不斷咁強迫性地聽住狂走音既情歌....

帝苑軒
The Royal Garden Chinese Restaurant
尖沙咀麼地道69號帝苑酒店低層B2
TEL: 2724-2666