Marshy is addicted to Food

呢晚姐姐個B滿月,但係低調唔想擺酒,只想一家人開開心心食個飯.bb個爺爺係潮州人,所以就選左呢間潮州酒家食個潮州宴.


我地同姐夫2家人剛剛好一圍人,所以就book左間房.不過其實話就話係房,其實都半開揚的,係入面做d咩出面都睇到哂.
菜單一早巳經由家姐姐夫佢地選好哂,所以一坐低就有得食.
食前飲杯功夫茶先

苦苦甘甘個人還可以接受到, 不過茶不太熱.

先來一個潮州凍蟹

嘩~呢2隻蟹奇大又厚肉!

睇下隻蟹既蟹膏多到bit哂出來,鮮味無窮.

呢隻只係小蟹鉗,但都啖啖肉,簡直鮮甜到極! 我本人本來係唔食得蟹(因為會敏感同腸胃有事),但最後都係忍唔住食左2大舊,真係正到無比. 聽講齋食呢2隻蟹單隻好似都要7~800幾蚊,所以唔食就真係走寶.

前菜併盤有潮州4式併盤(蝦棗,蟹棗,海蜤,鵝片)

蝦棗,蟹棗好好食,個人比較喜歡蟹棗,食落味道濃一點惹味d, 不過2款唯一唔好係外皮凍左,所以硬了少許;海蜤尚算不錯, 每條都好飽滿,不過特別就無乜; 鵝片比較遜色,有點太瘦鞋口.

呢味菜最有睇頭係呢個伴碟既壽星公.大廚仲特登入來同我們寒暄了幾句,原來佢係為左呢餐來挑呢個壽星公的!真係有心思.

食完前菜梗係到主角出場啦. 主角就當然係魚翅啦!

呢個花膠海皇翅, 花膠巳經燉到溶哂,所以同普通既翅唔同唔會好水,成碗翅都好傑味好濃,好膠質.而且魚翅之多簡直係我第一次見!每一啖都起碼有10幾條漲卜卜好飽滿既魚翅.

食完雖然好滯不過勁滿足,係我食過既魚翅當中最好食既.

食完翅就再來一個清淡小小既潮式蒸蒼魚.


講真蒼魚咁大條真係好少見,重要係食落一d都唔鞋口,骨又小,簡直係啖啖肉.個汁都好清唔太濃. 連一向唔鐘意食魚既妹妹都忍唔住口食左不少.

食完清淡又來一個味道極濃既豆醬雞.

老實講食到呢味大家都巳經好飽了,我肚子上既車駄仲就來大過一條真正既車駄, 所以我只吃了一點點. 味道真係好濃烈,只吃了一小口但一股好強烈既麻醬豆醬留在口腔內久久不散.雞燉到超淋軟狀態,用小刀輕輕一切巳經骨肉分離.吃了一小舊雞胸,不錯唔算太滑但一定係一味十分有水準既菜.

食完肉梗係有菜, 呢個金華火腿燴津白又係一道味道好濃既菜.

金華火腿切得薄薄的,好有咸香味;津白又係燉到淋哂一夾就散,非常喜歡.

食潮州野點少得糖醋面

一大個面餅,煎得十分香脆,重要係冇乜油睇落唔會好肥膩.大家雖然都勁飽不過呢個面還是清得十分快.

甜品有潮州3寶(蕃薯,芋頭,白果)

據聞呢個甜品要食就要之前預訂的. 個糖醬有點似拔絲一樣咁甜,蕃薯同糖醬味道十分夾,芋頭大家都讚不絕口,可惜我本身唔鐘意食,試了一口還是決定不吃;最好食都係白果,唔會苦,細細粒容易食,不知不覺食多十多粒.

最後仲有清心丸綠豆爽

好多綠豆,不過成碗都唔太特別,好一般, 仲唔係好夠熱.

BB滿月最後梗係要有大蛋糕啦

千其唔好誤會,BB係女仔來架....

呢餐吃得好飽好盡慶,埋單$78XX!!唔怪之得成晚服侍我地呢圍既阿姐勁好人,換碟攞野勁快手. 咁既價錢其實係普通酒樓擺2圍都仲有剩,不過BB滿月之餘又食到好食既潮州野,都好開心. 不過最可惜係我貪食之過第二日果然腸胃不適..../_\

百樂潮州酒樓
Pak Loh Chiu Chow Restaurant
尖沙咀柯士甸道西1號九龍站Elements 10
TEL: 3691 9168