Marshy is addicted to Food

是夜同另一半搵食搵到去九龍塘. 九龍塘最出名食泰國菜,雖然成條街滿佈泰國菜館,但好食個幾間都圍滿哂人.行左半個鐘,左揀右揀,最後都係幫襯最出名最多名人幫襯既金寶.


係金寶食野特別在除左d枱勁窄,窄到同隔離枱既距離同搭枱冇乜分別之外, 最特別係你可以叫下泰國野食下又可以叫下越南野試.
食泰國野梗係想食咖哩, 但自己本身又唔食得辣, 所以個度既阿姐就叫我試下越南咖哩. 越南都有咖哩? 不過算了,既然阿姐推介到而且又話唔辣就叫來試下了.

咖哩鮮牛腩煲配法包 ($55)


好多咖哩汁,牛腩好淋好好食, 仲有好多牛根,完全唔硬,真係正.咖哩真係完全唔辣,唔會好水剛剛好.薯仔切得略為大舊得滯.

有半條好大既法包.雖然略為凍左少少,不過仍然香脆鬆軟,點咖哩真係正到暈.一個人食半條都未夠喉.

串燒雞/牛/豬沙嗲 (6支)($38)

沙嗲醬冇沙嗲味,只得甜甜地花生味. 牛肉好硬,好用力先扯得開舊肉; 反而豬同雞不錯,淡淡既炭燒香味令人回味.

泰式炒粉 ($40)

上枱碟粉一pat, 賣相就認真麻麻地. 不過食落又十分不錯wor, 唔係好油膩,配料亦都好多, 芽菜仔條條都好漲卜卜好飽滿, 蝦仁好ok爽口, 食完一碗都唔會好滯.

泰式炒A菜 ($30)

十分多油,而且棵棵都好大棵菜,叫人點咬. 份量都幾多,不過太多油睇見都滯....

紅毛丹冰 (大:$20)

去親食泰國或者越南野首選一定係飲紅毛丹冰. 其一係個人喜好淡淡既近粉紅色調,有種說不出的浪漫感覺 (哈哈~); 其二係紅毛丹好好食. 呢度既紅毛丹冰都不錯, 唔會齋勁落糖水,紅毛丹起碼有4-5粒,雖然唔係好大粒,而且都知係罐頭貨,不過都不錯吃的.

2個人埋單$200,不是很貴,算幾抵食. 不過來食預左冇哂私穩,而且全冇寧靜可言, 想傾多陣計既話見議快d食完埋單行下九龍城公園啦.

金寶泰國菜館
Cam Bo Thai Restaurant
九龍城衙前塱道15號地下
tel: 2716 7318