Marshy is addicted to Food

是夜約左個久未見面既好友傾下計談下心,地點又係最方便大家既又一城. 又一城好多餐廳都試過,所以今次試下頂樓比較大眾化既意粉屋.


一直都覺得意粉屋其實就好似pizza hut既upgrade版一樣. 佢有一樣好處就係有好多款2人餐,價錢由百幾至4百幾都有, 任君選擇.呢晚同好友食, 就食個中價既套餐A ($268):

酥皮龍蝦湯(酥皮另+$11)


酥皮不錯,厚薄剛剛好;龍蝦湯味道預左有D假,好彩仲有D龍蝦肉襯托;味道偏咸.

芝士焗龍蝦天使面

想當年呢個龍蝦天使面剛剛推出時,我雖然唔太好天使面但都印象十分深刻,因為味道份量都好有水準. 之後幾次再食,其實水準巳不復當年.但個人性格不甘心,所以今次依家點選呢個天使面,睇下會唔會再有驚喜. 結果係, 比之前更失望.面頭先2塊薄脆變'淋'餅都算了,反正重點不在它們身上. 天使面一如以往份量依然係好多,但係一叉起,一大PAT面痴埋一齊,好似搵風筒吹左大半日一樣.汁只係面頭有,少之又少,而且仲係傑到無論.再次失望.

紅酒燴牛尾長通粉

上枱時真的好大一個鍋. 汁好夠味,長通粉都好多,入味就唔係好夠,不過有好多汁搭夠,算不錯了;牛尾其實唔係好多肉,不過都入味,肉夠'淋'.不錯, 好食過龍蝦天使面多多聲,冬天食呢個真係正.

朱古力溶岩軟心蛋糕配雲呢拿雪糕(另+$15)


話就話係溶岩軟心,上枱時D溶岩完全唔係蛋糕入面,只係淋哂係出面,朱古力蛋糕係不錯,好濃朱古力味,但軟心就唔多覺.配上雲呢拿雪糕一齊食呢個方程式係一定好食的.

凍朱古力咖啡 (另+$11)

當年我中意食意粉屋既其中一個原因係因為佢做既ICE MOCHACHINO十分正,每次食意粉屋就算要加錢都一定會轉飲的.不過近年佢同天使面一樣,每況愈下,次次飲完都失望一次.今次亦唔例外,不過佢無天使面咁失望,但巳失去了我以前對佢既熱愛.

除左套餐, 見佢推出左幾款小食,就點了其中一個:
焗小龍蝦菠菜南瓜茸配薄脆多士($42)


份量剛剛好夠2個人食當頭盤.旁邊既南瓜茸冇乜南瓜味,似薯茸多D.焗小龍蝦菠菜面頭既忌廉同芝士好夠,龍蝦就唔多見啦,菠菜就不少,味道好濃好夠味,不過食完好有罪惡感....多士不錯,夠脆.

本來一個2人餐2百幾蚊最後加呢樣加個樣食左$4XX, 其實都幾貴. 過左咁耐再來食都係覺得佢地既水準下降左,如果以咁既價錢, 寧願食PIZZA HUT.

意粉屋
Spaghetti House
九龍塘達之路 80 號又一城商場2層43號?
tel: 2265 8710