Marshy is addicted to Food

今日星期六半日工,終於下午可以鬆一鬆去行下街. 行完4點幾, 想起自己原來未食lunch, 返到屋企附近想買d野食,醒起最近德福新開左間赤丸製面所食烏冬,就想試下.不過自己一個, 唔習慣獨自係餐廳食野,所以唯有外賣返家,反正都好近. 呢間野專門食烏冬,話用既面粉全部係北海道運來,講到絕頂咁好食.而且之前係觀塘apm開左個間分店日日都咁多人排隊,都冇機會試.到今日終於都可以一嘗了. 叫左親子滑蛋撈烏冬($30) 賣相比想像中要好.雞既份量好多,都幾滑,洋蔥唔會好生,蛋漿雖然過熟了一點,但整體仍不錯. 不過唯獨是烏冬比較失望. 烏冬偏粗,但係好粉,太'林',又冇咬口,真係唔係好欣賞. 青蔥玉子湯烏冬($18) 由於本人唔食蔥,所以叫佢走哂蔥.其實本意係想試下佢點做個玉子, 點知出來既效果原來佢只係煎左隻蛋擺係碗齋烏冬上面,隻蛋仲要係勁細又少蛋黃....真係唔知講咩好...呢碗野我係屋企都整到.... 碎海藻($7) 海藻放係烏冬上面食又出奇地好食. 海藻本身都好彈牙,而且佢只係淥熟左佢,冇油冇調味,7蚊可以食到咁健康既海藻真不賴. 厚燒玉子($10) 一碟3片鮮黃色既蛋卷.食前都唔抱太大既期望,食左一淡真係跟預期一樣.好乾好'鞋'又好硬.不吃也罷. 香味豚肉煮($20) 一個字: 乾. 佢加左好多紅薑絲,所以d肉好大陣紅薑既味,由於本人唔中意食薑,所以對呢味小食唔太喜歡. 而且朱肉偏乾身,好鞋,太少汁了. 雖然係外賣,不過由鋪頭到番屋企都係不過5分鐘,所以食物既味道應該同外賣唔關事. 價錢其實十分相宜, 感覺主食既質素還可以, 不過小食方面真係有待改進. 赤丸製麵所 Akamaru Noodles Factory 九龍灣德福廣場第一期G98號舖 Tel: 2756 3998