Marshy is addicted to Food

最近工作繁忙,冇咩娛樂,連上幾套大製作既戲都冇時間睇. 趁住呢日放假,決定一口氣去又一城連睇2套戲. 睇完一套, 中午時間又係時候搵食. 行過呢間rice paper唔洗點等位, 決定一試.
內裡氣氛也不錯, 枱與枱之間都有空間, 有點法式情調.
唔想食好油膩既野, 揀越菜就最好. 睇餐牌, 都係d比較新穎既越x法式菜,價格唔算平. 唔係太肚餓, 2個女仔就點左:



菠蘿扎肉米卷
唔點醬基本上係淡而無味. 點埋個醬其實都唔係好夠味. 米卷太大條, 入面塞左太多配菜, 令菠蘿同扎肉都失色.


雞絲沙律
呢個沙律反而不錯. 最好食係佢加上既炸蒜片, 好脆好香. 值得一試.


鵝肝米卷
呢度最出名就係米卷, 但係食左頭先個扎肉米卷咁失望,點都唔係好甘心, 所以又點了另一個招牌 -鵝肝米卷. 不過一食,發現原來鵝肝係絕對唔夾米卷的,好不倫不類既感覺,另外個汁又奇怪,少少酸又少少嗆口.


咖啡蜜梨焗蛋白餅
整餐最滿意要算係呢個甜品.淡淡既咖啡香唔會好搶味,蜜梨加了點酒但好香好甜,配上口感鬆化既蛋白餅簡直一流!而且份量都幾大, 飯後2個人share就啱哂.

如果有機會,都會再去呢間餐廳,不過就唔會再叫佢地所謂'出名'既米卷了.

Rice Paper
九龍塘又一城L1層20號舖
Tel:2265-8615