Marshy is addicted to Food

今日要返大陸做野, 返到落來都4,5點,咁?妹妹剛剛係九龍塘放學,順勢就同佢來個晚飯聚聚.
本來想再去皇后飯店,不過前幾日先去完,想試下新野,見到板前壽司旁邊有間叫'雪村'既餐廳. 以前都唔多覺,因為佢開係最旁邊,十分唔起眼,係人一眼都會先想食板前先. 不過睇下佢門口既menu,原來係食串燒既,好耐都未食過日式串燒,就試下呢間吧.


6點入去,如果坐卡位就要7點半交番枱,証明平日都幾爆wor, 不過個半鐘,乜都食完啦, 所以冇問題,我地就坐卡位吧.
裝修算有日式風格, 再睇下餐牌, 2個人其實唔算好肚餓, 所以叫左:

山葵八爪魚($35)

去親居酒屋都好中意點呢個前菜食. 呢間既八爪魚做得不錯了,山葵(wasabi)既味道唔會好嗆,算比較溫和,但係又不失山葵原有既微辣味道.

鹽焗日本銀杏(10月-4月限定) ($50)

見到剛剛10月有得供應,就叫來試下. 上枱時仲係連殼,要自己動手,不過基本上每粒都巳經開左少少, 而且熱烘烘,銀杏肉好甘香,唔會好苦.有水準.

串燒雞肝($15), 串燒雞腿肉($15), 串燒美國牛脷($30)

雞肝十分不錯,唔會好粉,好入味; 雞腿肉反而有點失色,有點似雞胸,唔滑; 牛脷十分美味,肉質好彈牙仲有點油脂, 口感豐富.令人值得回味.

鹽燒鯖魚($45)

自問十分中意食燒鯖魚,係香港同日本都食過唔少,呢間既燒鯖魚做得算係十分有水準.魚肉好嫩好滑,皮亦燒到微脆,比我係日本食既仲更加好味.真係值回票價.

山梨紅酒豚肉,苦瓜沖繩料理($60)

上?時既份量嚇左一跳,真係幾大碟.苦瓜做得出色,我本身唔多食苦瓜,但呢味我都可以食到,苦味唔係好多,主要係做到好甘香,豚肉又係另一出色既地方,用既係山梨縣既豬肉,肉質甘香鬆軟,味濃但唔膩. 唯一缺點係蛋炒得有點老, 否則係一味十分出色既沖繩料理.

和牛芝士春卷($60)

和牛用既係A5和牛,附碟仲有一碟沙律醬同一碟秘制醬料點春卷.秘制醬料問個經理都答唔出材料名,只係話加左d薑咁,但我食落好有酸梅味. 不過既然佢講到用A5和牛,食時當然係唔會點任何醬,務求可以食到和牛既鮮味. 不過由於加左芝士,而且和牛既份量又唔係好多,所以基本上食唔出有幾特別好味.春卷皮係炸得好脆好薄,不過炸完冇完全吸油,表面十分油膩. 基本上呢味菜浪費左d和牛.

海膽壽司 ($50 - 2件)

睇落好似好新鮮, 食落都唔錯, 不過海膽味唔係太濃同唔係好甜, 普通水準.

日式布雷 ($25)

其實即係焦糖燉蛋.份量雖少,不過賣相幾別緻. 面頭個塊焦糖好脆好香,燉蛋亦好creamy好豐潤. 最重要係價錢相宜,有咁既質素算十分不錯了.

埋單2個人要$43x, 其實都算貴. 不過佢做既肉類真係不錯,好過刺身壽司.


雪村串燒
Kushiyaki Sesson
九龍塘又一城 L1-19A 號店
tel: 2265-7712