Marshy is addicted to Food

之前連續3日幫公司做野,今朝終於頂唔順起唔到身要請假.最後訓到下午先起身,想起自己未食野,咁啱家姐話好悶想出街食野,最後2個人走左去又一城. 本來想試下新開既agnes b cafe,不過睇佢入面一來價錢幾貴,二來燈光憂暗,情侶去就差不多. 呢個時候想起蘇絲黃介紹過既皇后餐廳,就走去幫襯.


4點幾,入到去人唔係太多,仲有卡位坐.
下午茶時間,本來想叫茶餐內阿蘇介紹過既乾炒牛河,不過竟然冇哂!!!
果然阿蘇效應都幾厲害....
唯有叫佢介紹既另一樣 - 煎豬排烏冬/米粉. 不過家姐唔食鳥冬或米粉, 所以改叫意粉.

煎豬排意粉(餐$50+1連飲品)

煎豬排好厚,唔係十分鬆軟但頗'林', 一食就知佢冇俺過,豬排偏瘦但仍有少少油脂,証明本身揀呢塊豬排巳經十分好,而且用咁厚既豬排來煎到咁既水準巳經十分不錯了. 意粉出奇地好食,夠入味. 不過個湯有少許似家x牌通心粉個湯底...

凍華田

本來一向都好少介紹餐茶,因為都係千篇一律,冇咩特別. 不過一飲呢杯凍華田就好驚訝!!自問飲過好多地方調既凍華田,但我從未飲過一杯咁好飲既!!飲落好香朱古力味,估計佢內裡亦溝左少許谷古粉.好香濃唔會好甜, 真係正!

我地仲散叫左:
羅宋湯 ($39 連餐包)

食得俄羅斯菜,羅宋湯一定不得不點啦. 佢呢間既羅宋湯不錯,唔會做到好水,材料亦好足,微辣,而且亦好大碗,食完其實都飽左一半.

周打魚湯 ($42連餐包)

個人喜歡呢個周打魚湯多過羅宋湯. 材料其實唔太豐富,不過唔水好香而且好creamy,最特別係佢面頭仲加左幾粒魚仔餅,多了幾分童真.

餐包

比較欣賞呢個餐包. 上枱熱烘烘,十分柔軟又鬆軟,要來浸係湯入面食真係一絕!!或者只塗少許牛油巳經十分美味.

占班戟 ($33+1)

呢個班戟真係做得好薄而且唔會黏埋一舊,士多啤梨果占亦都配合得好好,唯一唔太好就係佢只塗係中間,旁邊就完全冇果占.

下次一定要再來食乾炒牛河!!

皇后飯店
Queen's Cafe
九龍塘達之路80號又一城L118
tel: 2265-8288