Marshy is addicted to Food

最近愛上上網周圍睇食評睇飲食節目, 可能算是近日減肥中既一點安慰.
呢晚好少可地同阿妹出夜街, 去睇Avril演唱會之前, 應阿妹要求去左德福新開既POKKA CAFE度食晚飯.
由於我地6點幾去到, 都仲未見到好多人, 所以好快有位.
POKKA CAFE其實以前都去過另一間, 都係食日式西餐野, 感覺一般. 依家事隔幾年再來, 感覺格調high class左.
一入去就覺得張枱好細, 而且同隔離枱距離太近, 講私人野有點不方便.
餐廳所見清一色女侍應, 部長都係女人, 感覺好似比較親切.
waitress放低了2個餐牌, 一個人set dinner餐牌, 一個係散叫餐牌.
望了望set dinner, 雖然一個set大約100蚊左右唔算貴, 不過菜式好''行貨'', 而且又heavy, 所以冇打算叫set.
望一望散餐牌, 發現比以前多左好多新穎既菜式, 不過是夜不太肚餓又想食清淡d, 所以叫左以下幾樣:



迷你凱撒沙律
內裡配料選了比較清淡既三文魚同蝦. 份量的而且確係十分迷你, 不過蝦同三文魚粒都算多, 蝦一食就知係雪蝦, 三文魚都還算新鮮. 汁方面還是一般, 不會差不過冇乜特別.





介茉三文魚及八爪魚粒併盤
這個想當年早在銅鑼灣分店時巳經有食過, 當時感覺好好食. 事隔幾年再食, 一睇, 整得好求其, 不過唔算差, 只是沒有了以前那份美味. 八爪魚整得比三文魚入味, 這裡的三文魚跟凱撒沙律入面既三文魚粒冇甚分別.




三文魚併八爪魚冷稻庭烏冬
其實係日本食過好食既冷烏冬後, 係香港一直都搵唔番一樣水準既冷烏冬. 這次大膽又點左呢款, 希望會有驚喜. 三文魚同八爪魚不錯, 用來調味既鼓油早巳落了介茉, 所以唔需要另塗wasabi巳好刺鼻. 冷烏冬彈性很夠, 不過偏粗, 而且唔夠冷, 大大減了不少分.



白汁雞絲意粉
點了一個最簡單的意粉就是要看chief既功力了. 我們特意要求白汁要''傑''一點. 分量剛剛好夠一人, 雞柳不錯, 有少許酒香味, 又不會太老. 而主角意粉呢? 意粉粗幼度很好, 我比較喜歡幼身(即1,2號意粉)的, 因為最能吸收醬汁既美味. 不過雖然我要求白汁要''傑''一點, 但上枱時還是頗''水''的. 白汁跟意粉還是各自各分開, 有點失望. 不過呢個白汁做得很不錯, 很有忌廉及少許酒香. 意粉如果可以再煮硬身一點就更perfect.



伯爵茶香朱古力毛士蛋糕併木槺布甸
見到自家制既木槺布甸就點來試試. 分量頗大, 足夠2個人食. 木槺布甸值得一讚, 味道唔太甜, 入口即溶, 餅底鬆軟. 而朱古力毛士蛋糕也很不錯, 朱古力味濃郁, 餅底是偏硬的那種, 但跟毛士很配. 不過內裡既啫喱有點畫蛇添足了. 如果沒有了會更完美.

值得一讚既係入面既waitress跟部長都很細心, 每食完一個dish都會問你覺得點, 好唔好咁, 十分親切. 而收碟速度都很快, 所以雖然張枱好細, 但都唔會冇位擺野食. 總括來講呢間cafe都算唔錯, 唔會成日去, 不過間唔中一次半次去總會有些驚喜.

ps. 今次既驚喜係甜品.


百佳咖啡餐廳
Pokka Cafe
九龍灣德福廣場一期G99-100舖
Tel:2707 0881