Marshy is addicted to Food

呢晚同幾個舊同事聚舊. 同事揀左一間唔係好貴但出名好食既越南餐館試下.


一行5人去左旺角,多得舊同事老點,行左半個鐘之後終於搵到呢間出名既越南餐館.
雖然8點多, 不過人仍然很多,我地都等左15分鐘先有枱.
雖然5個人,但係因為太多人,所以只比左張4人卡位我地. 好彩我地其中3位同事身型瘦削才可以剛剛好坐滿.
由於個個都太肚餓, 所以大家都狂點菜, 最後點左:

4人套餐($328), 包括:

香茅雞翼4件 + 扎肉手卷4件

雞翼頗香口,肉質算嫩滑,對於很少在外吃雞翼的我也忍不住吃了一隻; 扎肉手卷我沒有吃,不過賣相幾清新,同事們很快夾哂,我想應該也不差了.

薄燒牛肉手卷4件 + 蒜蓉法包4件


薄燒牛肉手卷內有檬粉,牛肉就偏乾了點,不過味道不濃幾清爽的一道小食; 蒜蓉法包味道不夠濃香,偏細塊同薄身, 不過用手拿著點汁時大小剛好幾方便.

骰仔牛柳粒

加了很多蕃茄炒的呢味牛柳粒酸酸甜甜很開胃,牛柳粒亦很嫩滑,大小一口剛剛好. 半碟差不多是我一個人ko的.

秘製醬汁豬頸肉燒

呢味算是全晚最不受歡迎的菜式. 起初上枱時夠大碟賣相亦很好, 個個都忍不住夾一塊來吃,但一吃,嘩...仲乾過樹皮,又瘦又乾, 每人食左一舊之後很久都沒有人再店佢了.

馬拉盞蛋白鑊仔炒飯

炒飯份量唔係好大, 不過一食落好有鑊氣, 炒飯好清配料都ok多,十分不錯.

越式炒金邊粉

份量都幾大碟, 配料都幾多, 又唔油膩, 不過唯一不好的放涼了一點, 夾起來有點一舊舊的狀態.

除左套餐, 我地仲叫左幾樣散既菜式:

咖哩牛腩煲(附法包)($58)

小小的一煲有很多汁,4小塊法包絕對唔夠喉.咖哩汁味很濃郁, 不會很水, 牛腩偏肥,好淋好易入口, 很不錯.

馬拉盞炒通菜($38)

偏多菜管, 好少葉, 不過都好夠味又唔會過咸.

同事指定要試的: 牛油芝麻蝦球配檸檬白酒汁($62)

蝦球唔係好多隻,不過都頗大隻.蝦肉好彈牙, 配埋食落檸檬汁, 有點似食緊西檸鴨一樣, 外層炸既脆醬好薄, 食完一隻有點唔夠喉, 不過份量真係唔多,5個人都唔多夠分.

炸魷魚圈

呢個本人至愛,一入口外層真係好脆, 上枱仲係熱辣辣, 脆醬唔會好厚粉,跟魷魚剛剛好. 魷魚很新鮮. 吃完一個實在不客氣再連吃2-3個...

呢餐除左食物不錯之外, 仲可以同久久未見既舊同事暢談, 呢餐飯真係吃得高興.
有機會想同另一半再來呢度食.

越興園越南菜館
Yuet Hing Yuen Vitnameses Restaurant
旺角豉油街33號地下
tel: 2332-9872