Marshy is addicted to Food

呢晚又再次係九龍城浦頭搵食. 另一半感冒所以唔可以食泰國野, 要食d清淡少少既. 行來行去都冇乜頭緒, 點知竟然比我誤打誤撞搵到呢間聞名巳久既'大婆牛肉面'.


記得上次買左本食家李純恩既'食在香港', 提到呢間牛肉面店係佢老婆開既, 講到d牛肉勁好食. 所以第一次幫襯,乜都唔洗睇,梗係指定食碗牛肉面($38)先啦.

上枱熱騰騰,成碗湯偏黑色,飲一啖湯~嘩!!偏咸但好濃好惹味,帶點微辣但可接受;面條粗帶少許硬,啱哂我口味;主角當然係牛肉啦:

4-5舊大大塊既金錢展,再加2-3舊淆到淋pat pat既牛根.金錢展一夾好硬wor,以為入口都係咁不外如是, 點知真係一個驚喜,入口不但鬆軟味濃, 而且一d都唔痴牙,每塊展上既牛肉同呈膠質既脂肪分怖十分均勻,而且塊塊都有半吋厚,十分美味; 牛根就有少許失色,太淋有點一pat既感覺, 冇左彈牙爽滑既口感. 呢碗牛肉面真的吃得很過癮.

另一半要食清淡, 所以叫左大婆雲吞面($30)

吃了一個雲吞,內裡的菜肉還好,奈何皮太厚了,仲有點硬.相比起牛肉面呢個較為失色.

仲試左2個配菜:

濃香獅子頭($28)

上枱勁細碟, 3個獅子頭十分迷你. 入口好鬆好軟,一股濃烈既馬啼豬肉味留在口腔內久久不散. 不錯的但略嫌貴左少少.

上湯時菜(通菜)($18)

通菜十分乾淨整齊,讓人感覺吃得十分放心,份量都頗多,2個人好夠食.

2個人埋單$13x, 話貴唔貴話平唔平. 不過最有驚喜係碗牛肉面. 下次齋來食牛肉面就平好多了.
(sorry, 是次又唔記得帶相機, 只以手機拍攝, 效果勁差, 睇到眼花者, 敬請原諒..)

大婆牛肉麵
Big Wife Noodle
九龍城福佬村道5至9號地下C號舖
tel: 2718 2889