Marshy is addicted to Food

不久前見到雜誌介紹過呢間係淘大剛剛開張既日本料理店,見風評不錯,一直都想試.呢日2個人無無聊聊又係淘大行來行去,終於比我見到呢間野.6點幾都冇乜人,可能因為鋪頭真係太偏僻關係.


入到去到見餐牌散叫唔係太多選擇.不過第一次試,梗係散叫d,餐又叫d啦.所以我地2個人叫左:

雞扒烏冬($38)

雞扒都幾大塊,但有點兒乾.湯底都算清得來帶點味道.烏冬冇食,不過另一半話還不錯.

雞翼餃子($38)

一碟有3隻.賣相比餐牌的還吸引.飽滿既雞翼中間入面包住菜肉既餃子涵,如果d涵可以再熱d就更加好. 外皮炸得脆脆的,雖然十分熱氣都忍不住要一啖食落去.十分不錯.

三文魚卷($25)

雖然味道冇咩特別, 不過賣相好花心思,值得一讚.

海膽三文魚飯+迷你烏冬(set:$68)


份量都唔算好細,一個人食剛剛好.海膽唔算好新鮮,有點一pat pat狀態,反而三文魚都不錯,而且都ok大塊.旁邊2舊凍煎蛋就失色左d,如果冇呢2舊野仲好.迷你其實都有半個烏冬,清湯都不錯,冇咩味精.

最後試左個黑芝麻布甸($22)做甜品

好結實有濃濃既黑芝麻味道,好正. 唯一缺點就係太細杯了.

正當我地煩惱緊食咩甜品之際,有個類似manager既男士向我地推介佢地呢日剛剛整左既一款芝士忌廉,講話好好食.但係我地仲係度猶疑之際,佢好好人就話送左呢個比我地試:

雖然唔係好大杯,但係一食,嘩!好濃芝士味,再加上淡淡檸檬香,好濃調好滑.相比起黑芝麻布甸,呢個真係好食好多倍.下次我甚至願意再來幫襯佢只為呢杯甜品.

2個人最後食左$21x, 話貴唔貴,平又唔係平.不過服務確實是不錯.雖然見唔到日本人老闆,而且眼見幾個waitress都係新人,呆呆滯滯咁, 不過都算好有禮貌.

錦日本料理
NISHIKI
九龍灣淘大商場2期地下G208-209店
tel:2796 4428