自從搬左去九龍灣之後,鮮有時間過海. 呢晚舊同學生日,又有機會過海食好野.
初冬最好打邊爐, 所以呢晚去左灣仔呢間食小菜好出名既美味厨試下佢既打邊爐.


打邊爐之前先送上個子薑皮蛋做前菜. 由於我唔食薑, 所以唔知係唔係子薑啦. 不過皮蛋不錯,中間有糖心,唔會好硬好實.

上湯底前先自行隨意加醬料. 有10幾種唔同既配料任你落, 朋友們玩到不亦樂乎,加到成碗好似撈飯一樣. 我就正常d, 只加入淡鼓油,煙肉碎同2茶匙的麻醬, 巳經好夠味好正.

我地試左佢一個好出名既湯底,來呢度一定要先試下呢個:
三文魚豆漿梳乎里湯底




呢個三文魚湯底好濃豆漿味,但濃得來飲落又好順喉好清新, 唔會好油膩. 附湯底有幾個炸過既三文魚頭,滾一滾,d骨軟到可以吞落肚,而且好夠味. 仲有一碟三文魚,不過唔係刺身, 因為質素唔係太好, 只適宜碌熟d來食.不過唔洗碌到好熟,放落去灼一灼到半生熟巳經好好食,仲好食過刺身.
上面既梳乎里最好等到最後吸收哂食物既精華先食,十份入味,入口輕如吃綿花一樣,但又有濃濃既湯汁,食到不停口.

打邊爐不外乎都係個幾款野,牛肉,墨魚丸,腸仔之類既野. 先來重點牛肉:
牛肉叫左加拿大特級肥牛($48)

一碟唔係好多, 得10片左右. 不過質素就唔係太得,牛肉好老(唔關灼幾耐問題,我只灼左幾秒). 其實佢仲有好多款不同質素的牛肉,包括有神戶A5和牛, 不過價錢就太貴了,$488係呢d地方試我博唔過.
呢度比較特別係佢做既丸類.數埋有成廿幾款. 我地叫左比較少見既:
青蔥墨魚丸併紫心蕃薯墨魚丸($58)

雖然我唔食蔥,不過都試下呢個青蔥墨魚丸, 因為做型太靚了. 食落好彈牙,冇咩墨魚丸味, 因為巳經比d蔥蓋住哂d味.雖然幾好味, 不過個人都係忍受不了蔥個種味.
紫心蕃薯墨魚丸我冇食, 不過朋友們食左都有彈冇讚,又冇蕃薯味又冇墨魚味, 唔知想點.
最好食既丸算是佢既芒果釀豬肉丸($48).聽落好似好怪,不過食落好甜,豬肉丸好爽口彈牙, 十分不錯.
打邊爐少不了既仲有蔬菜類. 我地叫左個時令蔬菜併盤($58)

菜唔係併左好多,內有皇帝菜同少許唐生菜.粟米好甜,d菜都好新鮮,不錯.

仲有叫左醉雞中翼($48),完全冇醉雞味, 可以不點; 豬頸肉($38)麻麻地; 炸魚皮($28)不錯,不過貴左d; 上海韮菜豬肉餃($48)我完全食唔到有豬肉,內裡只有一大堆韮菜,差d以為自己食緊齋餃; 芝士腸($38)預左係超市一包包貨色,不過份量都幾多.


最後送上甜品雪梨雪耳糖水.

呢款糖水真係十分得女子歡心.因為好滋潤,甜甜地,雪梨同雪耳都煲到好淋好入味. 飲完成身溫暖哂,仲仿佛成個人都好滋潤了.

6女1男7個人埋單$940. 叫得唔係好多野,所以感覺都幾貴,不過除問每人都係百幾蚊,尚可接受.但係呢度既部長同侍應都好好人,態度十分友善,而且都坐得好舒服感覺乾淨企理. 而且呢度周不時會有名人明星上來食飯.呢晚就見到一個類似陳鴻業既物體上來食飯.


(茗茶:$9/位 醬介$20/位)
美味廚
Megan's Kitchen
灣仔灣仔道165至171號樂基中心5樓
tel: 2866 8305
創作者介紹
創作者 marshy 的頭像
marshy

Marshy is addicted to Food

marshy 發表在 痞客邦 留言(0) 人氣()