搵食篇 - 松記糖水 @ Marshy is addicted to Food

係德福住左成年, 觀乎呢度既食店樣樣都有, 唯獨就係欠缺了一間中式糖水鋪.
呢晚家姐過來探親食飯, 講起呢樣野,大家忽然心血來潮十分想食一碗糖水, 所以就揸車去搵好味既糖水. 最近食過真正好味道, 令人回味既糖水唯有呢間松記.

係呢度有一個好處係除左佢既糖水好食之外, 你仲可以發揮你既大貪本色,加呢樣個樣,加乜都得.
難得'出城'既我來到梗係貪一貪先:

芒果琉璃($22) + 黑珍珠($3) + 忌廉涼粉($5) + 紅毛丹($7)

上枱時份量真係嚇死人,足2個人食.好彩我未食飯,唔係一定食唔哂. 附加有芒果醬跟椰奶各一小瓶.
佢做既琉璃真係好神奇,雖然都係用西米做, 但唔知點解可以做到脆卜卜,咬落口感真係十分得意,食過佢其他既西米, 覺得還是琉璃最好食. 芒果亦好大塊,而且仲有3塊之多. 紅毛丹好大粒,有成5-6粒,每粒入面仲釀左粒菠蘿,真係好心機.

雖然呢碗真係人間極品,不過如果閣下想慢慢品嚐既話都好難.因為一到夜晚呢度就人山人海,雖然d阿姐好好人唔會趕你走仲好好禮貌叫你慢慢食,不過見到咁多人等緊都唔好意思阻住人做生意啦.