Marshy is addicted to Food

上次同家姐去皇后餐廳試左下午茶十分不錯之後,妹妹一直飲恨仲未食過呢間餐廳.所以今晚就同佢試下呢度既晚餐.
(唔好意思因為決定得太急,冇帶相機,只係用手機影,質素十分差....)


7點幾入座率都有8成,唔洗等位最好,不過2個人既話呢個時候想要卡位就真係冇乜可能了.
我地叫左2個餐:

燴牛利意粉餐 ($117)
先來一個羅宋湯

個湯都係咁好飲, 材料好多,又唔會好酸同好水,味道剛剛好, 不錯.

燴牛利意粉

分開上意粉同一盤牛利.意粉都好多,不過最令人驚訝既係十分之多牛利同茄汁!!!牛利係原條上,唔係一般切條,唔係話好厚,不過每條都幾大條,有成5-6塊,真係齋食哂d牛利都飽哂,而且茄汁唔係好水個隻,睇得出係有用心來做呢個汁既.

大蝦鮮菜沙律牛柳餐($180)
大蝦沙律

份量真係少得可憐.大蝦其實都唔係好大隻,鮮味彈牙就冇乜.青瓜同番茄都係得幾片,真係唔多夠.

5成熟牛柳

牛柳其實唔係好大件.配上磨菇汁味濃十分配合.牛柳真係做到5成熟,外面層皮硬左dd, 不過入面呈粉紅色而且十分柔軟嫩滑, 仲有好濃既肉汁. 真的very good!!其次係伴碟既幾片薯仔,真係做得不錯,唔會好粉,有點爽口得來仲好柔軟,讚!!

當然仲有上次既驚喜凍華田啦

今次又再叫,水準依舊係好正!!今次真係飲得出佢係加左谷古粉,好濃朱古力味但又有阿華田味,2種交雜起真係好對味.

仲有另叫既占班戟($33)

上次叫時唔記得叫佢另上果占,攪到食既時間周邊都冇果占, 好唔均勻. 今次聰明了,叫佢另上.
自己搽,搽滿成塊,加上班戟本身真係好薄好柔軟,一口成一塊都唔過份, 不過咁好食既野梗係要分開幾啖慢慢嗒真d啦.

點菜時部長好攪笑. 見到餐牌有個叫露荀cocktail,唔係好知咩來, 就問下個部長.點知個部長答: [呵,呢個咪細細杯,插左幾支露荀咁lor, 好細杯架咋,得個雪糕杯咁大,d露荀都係用罐頭露荀...]
我聽到時唔知應唔應該多謝呢位部長咁坦白地倒公司米呢....?

皇后飯店
Queen's Cafe
九龍塘達之路80號又一城L118
tel: 2265-8288